اليوم الثلاثاء 24 أكتوبر 2017 - 11:25 صباحًا
أخر تحديث : الإثنين 20 يونيو 2016 - 9:53 مساءً

الستيلو فــــــــايض، عنداك قاميجتك، أيها ‫#‏الفاعل_المدني‬ !!!

صفروسوريز: رشيد أو الطاهر

أيها #الفاعل_المدني

غادي ندوي معاك بالدارجة اليوم، من مغربي لمغربي ..

بغيتي تمشي لمراكش؟  سير !

بغيتي تدوز ثناعشر يوم فلوطيل شارب و واكل و “شارب” و “واكل” ؟ سير، من حقك .. الدولة مضبرة فالفلوس من شتى أنحاء العالم باش بنادم ياخذ راحتو فمراكش أثناء عقد مؤتمر المناخ، قلبتي بعدا على شي جمعية قاصحة تمشي معاها؟ ولا شي ائتلاف مغيز فيه غير السميات لكبار اللي كايخلعو؟ إيوا ضبر ضبر ماحد باقي الحال شوية، إيلا ما لقيتيشن شوف ليك شي صاحب ولا صاحبة فهادشي ديال مجلس حقوق الإنسان، راه قالوليا هو اللي مكلف يجمع الفاعلين المدنيين ويدير القرعة ديال الحج لمراكش، آه، وتقيد ليك فاللقاءات الجهوية اللي سميتها “البري كوب” و سير حضر فطنجة إيلا عندك باش فواحد التويشية سميتها “ميد كوب” و حتى فهاداكشي ديال “الكُويْ” ديال الشباب زعما، باش ما تمنع ليك حتى فرصة، وباش تبان فالمحطات كلها و يقولو عليك فاعل مدني مهتم بقضايا البيئة، وتقدر فهاد الربعشهور تولي خبير فقضايا المناخ و الشباب و الهجرة المناخية، ساهلة زعما، راه ماشي بالقراية هاد ليامات، راها غير بالتساطيح،  و يقدر من بعد يعيط عليك عمو مصطفى تدخل لشي لجنة تنظيمية و يكثرو عندك الباضجات، وتولي إنسان مهم خلال الإثني عشر يوما في مراكش، تتصور على خاطرك مع شي شخصيات مهمة كاتبان عندنا غير فالتلفزة، و غادي تتلاقا مع الوفود المفاوضة من شتى بقاع الأرض، و تقدر تتصور مع شي رئيس دولة كاع، و تحقق لراسك شي حلم من الأحلام السعيدة ديالك، غير وجد الكوستيمات باش تبدل، ورزمة ديال كارط فيزيت بلاستيفيي و شي تيليفون عندو كاميرا أكثر من خمسة ميغابيكسال، وهانتا مبرع بالتواجد في قلب أكبر حدث حول التغيرات المناخية في العالم، كوب 22، غادي يعجبك الحال أكيد، خصوصا إيلا كنتي من هادوك اللي بكاو أو تباكاو نهار ما نظمش المغرب لا كوب دي موند، غادي تحس براسك فخور بالمغرب و غاتهز الراية و تتصور بيها و تدير السيلفيات حتى تسخف، وتقدر تدير لينا من تما بعض المنشورات اليومية أو تدير بالمرة حوارت إذاعية أو مصورة حول تطور المفاوضات المناخية و حول مواقف مجموعات الضغط من مسألة التكيف أو مسائل التقليل من الانبعاث الغازي و تولي صحفي بالمرة نيت، المهم غادي تكون فاعل مدني مناخي مزدهر، و غاتزيدها فالسيفي ديالك باش لاكوب الجاية ان شاء الله تلبس عاوتاني الكوستيم و تركب فالطيارة.. باش تمشي تخدم مصالح المغرب عن طريق الديبلوماسية المناخية المتوازية الأضلاع !

أما أنا، فأنا ماكانفهمش فالمناخ، وماكانلبسش الكوستيم، وعندي حساسية مفرطة من الكاميرات و الميكروفونات، وكانخاف أصلا نركب فالطيارة، خصوصا إيلا ماخلصتهاش ! ولكن منذ بضع سنوات، تساريت شوية فالبلاد، و سمعت ناس تتكلم، ناس أغلبيتهم مخيخين وطالع ليهم الغاز حتى سخن ليهم الراس مزيان مع هادشي ديال المناخ و البيئة و الحقوق و الثروة، منهم من قضى نحبه ومنهم من ينتظر، كلهم مغاربة، مواطنون، وأغلبهم ماكايلبسوش الكوستيم و ماكايركبوش فالطيارة، و لكن عارفين الدقة  فين جاتهم، و حاسين بالمزود و مصمكين بيه، و ما كايطبلوش للباطل باش ياخذو باضج و سيلفي مع شي مسمار من مسامر الميدة، ناس قادرين يقولو “لا” فمواقف أنت كاتقول فيها “نعاماس” غير باش تاخذ غرفة سينغل، ناس ضربات الغيس و الشموشات و الغبرة وطلعات ونزلات في الشعاب و الجبال و الصحاري وناقشات و سهرات و كتبات، باش أنت و اللي بحالك، اللي يلاه قطر بيهم السقف، ياخذو التوصيات و يميعوها بمطالب سطحية على طاولات العاصمة، أو أمام كاميرا و ميكروفون، أو من أجل رحلة لشخصين !

وما دمتي غادي غادي لمراكش، وكلامك المزوق اللي غا تحفظو من المطويات والمطبوعات الرسمية غادي يتسالا ليك دغيا فاليومين اللولين، وغادي يخصك ما تقول قدام الأضواء و حول موائد الطعام و خلال جلساتك فالمقاهي مع مندوبي و مندوبات الدول زرقاء العيون أو مناطيح و منطيحات دول كحل الراس، فما فيها باس تدي معاك هاد جوج كليمات أمانة تغسل بيها مساويء كثيرة تورطتي فيها بهاد الرحلة، وأصلا أصلا أنت كنتي غادي غير مغرر بك و غير بوق لوحدين خرين، اللهم تكون بعدا بوق للمغرب، المغرب ديال بصح !

قوليهم قالوليكم لمغاربة، غا هنيونا نتوما وها حنا بيخير، غا ماتبقاوش تبيعو لينا التخربيق وتكذبو علينا بالاشهار باش نشريو التخربيق، وملي نشريو تخربيقة منكم ونعيقو بيها غير تخربيقة خاصنا نشريو تخربيقة أخرى عاوتاني اللي نحيدو بيها التخربيقة الاولى، وكانبيعو التخربيقة اللي حيدنا بونوكازيون لشي واحد اللي حتى هو يبيعها لواحد آخر حتى كتسالي هاديك التخربيقة مسقفين بيها شي براكة فشي قنت، كاتنتج لينا غير الصدأ و سخونية الراس .. وهكذا !

قوليهم قالو ليكم لمغاربة، عقنا بيكم كاتعومونا فالحلول المزيفة حيت ماشي غرضكم الإصلاح، بل غرضكم تخلقو تسميات جديدة  لأسواق جديدة الهدف منها ماشي  التقليل من الاستهلاك بل فقط تعوضوا بيها الأرباح التي نقصات ليكم بسباب هاد الهيت ديال المناخ و الأزمة البيئية، قاليك زيرو ميكة ! راه شفنا ماما سميرة و عمو مصطفى مصورين بشي قفيفات كلاص ديال الدوم و عندهم شي يديدات مزيونين ديال الجلد، آش خبار المارشيات ديال خوصصة نبات الدوم بالمغرب ؟ قوليهم معاك، راه مابقيناش دايرين عين ميكا، ومابقاتش مقلوبة علينا القفة !

قوليهم قالو ليكم المغاربة، الطاقة الشمسية زوينة والطاقة الريحية زوينة، والشمس و الريح ديالنا كاملين، ويلا بغيتونا نبقاو زوينين خاص كل مغربي حتى هو يكون عندو الحق ينتج الطاقة فالسطح ديالو و يبيعها، بحالو بحال الوكالة ديال الباكوري، و خاصنا كاملين نتملكو المعرفة اللازمة باش ننتجو الطاقة و نصاوبو الألواح الشمسية و الفرفارات و الكابلات و البولونات ديال هاد القزادر، ماشي نبقاو ديما عبيد مستهلكين لواردات شركات “إلــه الشمس الجديد” ! الشمس حق لكل الكائنات، من غير مصاصي الدماء، واليوم هاحنا كانشوفو العكس، وراه حنا عايقين بيكم !

قوليهم قالو ليكم لمغاربة، حشومة وعار نبقاو حنا، الدولة العتيدة، خاضعين لأهواء قبائل منتجة للنفط، كاتجرجرنا فالمحافل الدولية وكاتذلنا بجوج دريال باش نصوتو لصالحها باش هي تزيد تبيع المازوط و تدير لاباس و تفسد في الأرض، في حين حنا نقدرو نهزو راسنا و نخدّمو أمواج بحورنا و بكل موجة نشعلو مصباح، وحق مولانا !

قوليهم قالو ليكم لمغاربة، عااااار عليكم تخنقو مدينة بحال آسفي بالشاربون أكثر ما هي مخنوقة، و تزيدوها بالخطر النووي من بعد ما الشعوب الفاهمة سالات مع الفحم والنووي، و فضلت قيمة حياة الإنسان على حفنة ديال الدراهم و زهو زائف ديال المونوبول !

قوليهم قالو ليكم، راه عيب و إجرام هادشي اللي كاديرو فخزانات المياه الجوفية ديال لبلاد، راه عار عليكم يا أتباع الدين الأخنوشي هاد الهدر ديال حقوق الأجيال القادمة ، راكم كاتجردو مغاربة المستقبل من السلاح في ساحات المعارك القادمة حول الماء و مع الماء و بالماء، راه إجرام أن الصحاري تنتج الدلاح، و إجرام أكبر أن الصبليون و روسيا و كندا ياكلو مطيشة ديال بلادنا، واش هادشي ماباينش؟؟ ولا خاصو الثورة باش يبان ؟ هاديك راها بلدان عندها من الماء ما يكفي و يفيض، وانتوما ما بغيتوش تعيقو يا اصحاب المغرب الاخضر، او أنكم عايقين ودايرينها بلعاني؟ غادي تنشفوها مزيان و من بعد تهزو سلالتكم لشي بلاد أخرى فيها لما و تخليو لينا حنا غير الرملة، وشوف تشوف واش تبقى الرملة حتى هي !

قوليهم قالو ليكم، راه حنا عارفين كلشي و مقيدين كلشي، وراه حنا حاظيينكم، و يعياو صحاب لغرافاطات منكم يكذبو ويزوقو، راه حمار الشلح مانايضش ما نايضش، ماحد الشعب ما عندوش سيادة على الموارد ديالو، ماحد باقي “هرم المناشير” خدام في جسد المغرب، من المنشار الأكبر إلى المناشير الصغيرة، ما حد برلماننا عامر بناس همهم هو جطّْهم في  ضيعة و مقلع و إسمنت على الشاطيء، ماحد اللي دوا على حقو في معدن يرعف، واللي دوا على قانون منصف يتكتف، و اللي دوا على عدالة يسهطوه حتى يسخف ! ماحد هادشي باقي، راه الأزمة البيئية باقية، ديرو الكوب ولا خليوه !

مانعرف واش تقدر تقول هادشي كامل، و أنت الفاعل المدني الكلاص، خديم التوجهات الكبرى و المناظير الاستراتيجية الوطنية و الحارس الأمين للصدى الثقافي و السياسي و الاجتماعي، و اليوم زدتي البيئي حتى هو، مانعرف واش عندك قرجوطة ديال النحاس باش تقول هادشي فمراكش، غير تفكر مزيان أن اللي كايدوي على هادشي راه كايحب المغرب، راه الوطنية هي اللي كاتهضرو، وحسب آخر تصنيف معمول بيه فالبلاد، فإما أن يكون المرء وطنيا، و إما أن يكون خائنا !

بغيتك، أخي الفاعل ، أختي الفاعلة، ملي تمشي لمراكش تنصاع لهاد الجملة الأخيرة و ما تكون خائن لبلادك فعلا، و إياك ثم إياك من ازدواجية المعايير فمسالة الوفاء و الخيانة، راك فاهمني !

أما أنا، غادي نقدر نتلاقاك فشي مسيرة ولا وقفة خارج البافيون اللي فيه صحاب لكرافاطات فمراكش، إيلا لقيت باش نمشي وباش نخلص على راسي، غاتلقاني يمكن مع سكان الواحات كانندد بسياسة تجفيف الفرشة المائية لدرعة وتافيلالت، أو تقدر تلقاني مع الغاضبين من جمعيات سكان الجبال كانطالب حتى أنا بعدالة جبائية قبل من العدالة الموناخية، أو تلقاني مع تكتل صغار المزارعين بحوض البحر الأبيض المتوسط، أو مع صغار الصيادين المنحدرين من مناطق متنازع عليها، و تقدر كاع ماتلقاني ما نلقاك حتى يدوز عام من بعد لا كوب22، أنا غادي نكون عايق بالنظام أكثر، و أنت غاتكون زدتي شي جوج سطورا فالسيفي ديالك، وكاتحس بالرطوبة !

سنلتقي !

تحية من مشروع المواطن، إلى #الفاعل_المدني

أوسمة :

أضـف تـعـلـيق 0 تـعـلـيـقـات



ان موقعنا الالكتروني يحتفظ بحقه في نشر او عدم نشر اي تعليق لا يستوفي شروط النشر، وتشير الى ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الموقع وهي تلزم بمضمونها كاتبها حصرياً.

شروط النشر: اننا نشجّع قرّاءنا على المساهمة والنقاش وابداء الرأي وذلك ضمن الاطار الأخلاقي الراقي بحيث لا نسمح بالشتائم أو التجريح الشخصي أو التشهير. كما لا نسمح بكتابات بذيئة او اباحية او مهينة كما لا نسمح بالمسّ بالمعتقدات الدينية.


أخبار وطنية

المجلس الوطني لحركة أنفاس يرسم خارطة طريق للخروج من المأزق الذي تعيشه البلاد.
20 أكتوبر 2017 / قراءة

المجلس الوطني لحركة أنفاس يرسم خارطة طريق للخروج من المأزق الذي تعيشه البلاد.

صفروسوريز: متابعة. بيان المجلس الوطني لحركة أنفاس: تعاقد وطني يؤسس لعهد الملكية البرلمانية تداول المجلس الوطني لحركة أنفاس الديمقراطية في أزمة نسق النمط السياسي المغربي و حالة الاختناق المؤسساتي الراهنة و خلص إلى إصدار البيان التالي : في تشخيص الأوضاع : ü تذكر الحركة بالأجواء التي صاحبت للاستحقاقات الانتخابية…
+ المزيد من أخبار وطنية ...